დღეს საპარლამენტო უმრავლესობის ლიდერი დავით საგანელიძე ჩინეთის სახალხო რესპუბლიკაში ვიზიტის ფარგლებში სინძიან-უიღურეთის ავტონომიური რეგიონის გუბერნატორს, შოჯრატ ზაქირს და ადგილობრივი მთავრობის ხელმძღვანელებს შეხვდა.

მხარეებმა "ახალი აბრეშუმის გზის - ეკონომიკური სარტყელის" პროექტში საქართველო-ჩინეთის თანამშრომლობის პერსპექტივები განიხილეს.

სინძიანის პროვინციის გუბერნატორი საქართველოში ბოლო წლებში ჩინური ინვესტიციების გაზრდის ტენდენციას  მიესალმა და მომავალში ორ ქვეყანას შორის სოფლის მეურნეობის, სატრასპორტო და ენერგეტიკის სფეროებში თანამშრომლობის გაღრმავების იმედი გამოთქვა.

მან ასევე ქართულ მხარეს თბილისში დაგეგმილ აბრეშუმის გზის ფორუმზე მოწვევისთვის მადლობა გადაუხადა და აღნიშნა, რომ საქართველოს პრემიერ-მინისტრის, ირაკლი ღარიბაშვილის ინიციატივა მნიშვნელოვნად გაზრდის ორ ქვეყანას შორის სავაჭრო-ეკონომიკურ მიმართულებებს.

შეხვედრაზე დავით საგანელიძემ საქართველო-ჩინეთის ურთიერთობების განვითარებაში ურუმჩის მნიშვნელოვანი როლი აღნიშნა. საქართველოს ოფიციალური დელეგაციის ვიზიტი ჩინეთში სწორედ ურუმჩიში დაიწყო.

საპარლამენტო უმრავლესობის ლიდერმა ასევე ხაზი გაუსვა საქართველოში მეღვინეობის მნიშვნელობას და იმედი გამოთქვა, რომ სინძიანის გუბერნატორის დახმერებით შესაძლებელი გახდება ურუმჩიში ქართული ღვინის გავრცელება.

შეხვედრაზე დავით საგანელიძემ საქართველოში ჩინეთის სოფლის მეურნეობის მინისტრის სამუშაო ვიზიტის წარმატებაზეც გაამახვილა ყურადღება და აღნიშნა, რომ ჩინური მხრიდან მსგავსი სახის დელეგაცია პირველად ეწვია საქართველოს. მან მადლობა გადაუხადა ჩინურ მხარეს აღნიშნული ვიზიტის დროს საქართველოსთვის სამეურნეო ტექნიკის საჩუქრად გადაცემის გამო.

საქართველოს სამთავრობო დელეგაცია ხვალ შაანსის პროვინციის ქალაქ სიანში გაემგზავრება, სადაც საპატიო სტუმრის სტატუსით საინვესტიციო - სავაჭრო ფორუმში მიიღებს მონაწილეობას. საერთაშორისო გამოფენაზე მოეწყობა საქართველოს ეროვნული პავილიონი, სადაც წარმოჩნდება ქართული ისტორიულ-კულტურული და ეკონომიკურ-სოციალური გარემო. საქართველოს ტურიზმის, ღვინის საინვესტიციო ეროვნული სააგენტოების წარმომადგენლები სტუმრებს საქართველოზე ინფორმაციას მიაწვდიან.

საქართველოს ოფიციალურ დელეგაციაში კულტურის მინისტრის მოადგილე, ლევან ხარატიშვილი, სოფლის მეურნეობის მინისტრის მოადგილე, ლევან დავითაშვილი, საქართველოს პარლამენტის წევრები და მსხვილი ბიზნესის წარმომადგენლები მონაწილეობენ.