ბაქოში ევრონესტის საპარლამენტო ასამბლეის თანაპრეზიდენტების ვიქტორ დოლიძის და ჰეიდი ჰაუტალას სამუშაო ვიზიტი შედგა. ვიზიტი მას შემდეგ დაიგეგმა, რაც აზერბაიჯანმა ცალმხრივად შეწყვიტა ევრონესტის საპარლამენტო ასამბლეაში მუშაობა. რიგი მიზეზების გამო, ვიზიტი სწორედ იმ დღეებში შედგა, როდესაც აზერბაიჯანსა და სომხეთს შორის, მთიანი ყარაბახის გარშემო კონფლიქტის ესკალაცია მიმდინარეობდა.

აღნიშნული მიზეზების მიუხედავად, ევრონესტის საპარლამენტო ასამბლეის თანაპრეზიდენტებმა შეხვედრები გამართეს აზერბაიჯანის საკანონმდებლო და აღმასრულებელი ხელისუფლების უმაღლეს წარმომადგენლებთან.

„ჩვენი უპირველესი მიზანია ევრონესტის საპარლამენტო ასამბლეის მუშაობის პროცესში, აზერბაიჯანის უსწრაფესი დაბრუნება. ქვეყანაში მიმდინარე ურთულეს ვითარებაში, ჩვენი ბაქოში ვიზიტი დიდ მნიშვნელობას სძენს მოლაპარაკებების პროცესს. აღმოსავლეთ პარტნიორობის ფარგლებში და არა მხოლოდ, საერთაშორის სამართლის პრინციპების საფუძველზე, სახელმწიფოთა ტერტორიული მთლიანობა და სუვერენიტეტი უმთავრესი საფუძველი და ხელშეუხებელი თემაა“, - განაცხადა ვიქტორ დოლიძემ. მან კონსულტაციების გამართვის და თბილისში ან ბაქოში შეხვედრის მზადყოფნა გამოთქვა.

ჰეიდი ჰაუტალამ, პრობლემის მოსაგვარებლად, აზერბაიჯანულ მხარეს შესთავაზა, რომ შეიქმნას სამუშაო ჯგუფი მთიან ყარაბაღთან დაკავშირებით ან ევრონესტის საპარლამენტო ასამბლეის ფორმატში არ მოხდეს ამ საკითხის განხილვა. 

„დარწმუნებული ვარ, რომ დებატები 12 აპრილს, ევროპარლამენტში იქნება კორექტული, მით უფრო მაშინ, როდესაც საგარეო საქმეთა და უსაფრთხოების პოლიტიკის სფეროში, ევროკავშირის უმაღლესი წარმომადგენელი ფედერიკა მოგერინი მოხსენებით გამოვა“, - განაცხადა ჰეიდი ჰაუტალამ.

მასპინძელი მხარის წარმომადგენელთა თქმით, აზერბაიჯანი ევრონესტის საპარლამენტო ასამბლეაში თანამშრომლობის განვითარების პიონერი იყო, თუმცა, მიაჩნიათ, რომ არაფერი თვისობრივი სარგებელი ამ პროცესს არ მოაქვს. როგორც შეხვედრაზე აღინიშნა, აზერბაიჯანის პარლამენტის თავჯდომარემ, ევროპარლამენტის პრეზიდენტ შულცს რამდენიმე წერილი და მოსაზრება გაუგზავნა, რასაც რეაქცია არ მოჰყოლია. მისივე თქმით, აზერბაიჯანი სომხეთისგან განსხვავებით, არ აპირებს ევრაზიის კავშირში გაწევრიანებას, მაგრამ ამავე დროს არ აპირებს ნატოში და ევროკავშირში გაწევრიანებასაც. აზერბაიჯანს გააჩნია მკაფიოდ გამოკვეთილი პოლიტიკა, რომელიც ნატოსთან და ევროკავშირთან დაახლოებას, მათთან ეკონომიკური, ენერგეტიკული და უსაფრთხოების სფეროებში თანამშრომლობის გაგრძელებას გულისხმობს.

ა.წ. 12 აპრილს, მთიანი ყარაბახის გარშემო მიმდინარე მოვლენებთან დაკავშირებით, ბრიუსელში ევროპარლამენტის რეზოლუციის მიღებაა დაგეგმილი, რამაც შესაძლოა გადამწვეტი როლი ითამაშოს აზერბაიჯანის და ევროპარლამენტის სამომავლო ურთერთობებზე.
მაისში ბრიუსელში აღმოსავლეთ პარტნიორების საგარეო მინისტრების შეხვედრა გაიმართება.