დარგობრივი ეკონომიკისა და ეკონომიკური პოლიტიკის კომიტეტის თავმჯდომარე დავით სონღულაშვილი კატარის სახელმწიფოს პარლამენტის საქართველოსთან მეგობრობის საპარლამენტო ჯგუფის წარმომადგენლებს შეხვდა.

შეხვედრაზე მხარეებმა მიმოიხილეს ქვეყნების ეკონომიკური, კულტურული და საპარლამენტთაშორისო ურთიერთობები. აღინიშნა საერთაშორისო ფორუმებსა და პლატფორმებზე ორ ქვეყანას შორის ხშირი თანამშრომლობისა და მუდმივი მხარდაჭერის მნიშვნელობა.

სტუმრებმა ხაზგასმით აღნიშნეს, რომ კატარის სახელმწიფო და საქართველო იმ ქვეყნებს შორის არიან, რომლებსაც მნიშვნელოვანი წვლილი შეაქვთ გლობალური მშვიდობის შენარჩუნებაში.

დავით სონღულაშვილმა მიმოიხილა საქართველოსა და კატარს შორის სავაჭრო ურთიერთობები და მზადყოფნა გამოთქვა, თავისუფალი ვაჭრობის სფეროში აქტიური თანამშრომლობისთვის.

კომიტეტის თავმჯდომარე ასევე ერთობლივი ეკონომიკური ფორუმის გამართვის ინიციატივით გამოვიდა, სადაც კერძო სექტორის წარმომადგენლებს შესაძლებლობა ექნებათ, გაეცნონ ერთმანეთს და განავითარონ საქმიანი კავშირები, რაც თავის მხრივ, ინვესტიციების გაზრდას შეუწყობს ხელს.

შეხვედრის ბოლოს ისაუბრეს პარლამენტებს შორის მემორანდუმის გაფორმების შესაძლებლობაზე.

დავით სონღულაშვილმა კატარის დელეგაციას მადლობა გადაუხადა აქტიური თანამშრომლობისთვის და საქართველოს ტერიტორიული მთლიანობის მხარდაჭერისთვის.