დიასპორის კომიტეტის სხდომაზე, საგარეო საქმეთა სამინისტროს საკონსულო და დიასპორის საკითხების დეპარტამენტის მიერ 2025 წელს გაწეული საქმიანობისა და 2026 წელს დაგეგმილი ღონისძიებების შესახებ ინფორმაცია მოისმინეს.


„2017 წლიდან, მას შემდეგ რაც დიასპორასთან ურთიერთობის თემატიკას საგარეო საქმეთა სამინისტრო წარმართავს, კიდევ უფრო აქტიური და პროდუქტიული გახდა დიასპორასთან თანამშრომლობა. დიასპორის მხარდამჭერ ღონისძიებებს, მათ შორის მიზნობრივ პროგრამებსა და პროექტებს კიდევ უფრო მეტი ყურადღება ეთმობა სახელმწიფოს მხრიდან“, - განაცხადა საკითხზე მომხსენებელმა, საგარეო საქმეთა მინისტრის მოადგილემ ხათუნა თოთლაძემ.

მომხსენებელმა, საანგარიშო პერიოდში, საგარეო საქმეთა სამინისტროს კოორდინაციით განხორციელებულ ღონისძიებებზე ისაუბრა.
მან ყურადღება დიასპორის დღეზე გაამახვილა, რომელიც ყოველწლიურად, 27 მაისს იმართება და რომელშიც როგორც დიასპორის, ისე ხელისუფლების ყველა შტოს, საპატრიარქოს და სამეცნიერო საზოგადოების წარმომადგენლები მონაწილეობენ.

ხათუნა თოთლაძემ სხდომაზე ისაუბრა იმ მნიშვნელოვან პროგრამებსა და პროექტებზე, რომლებიც საზღვარგარეთ, საგარეო საქმეთა სამინისტროს ინიციატივით და დიასპორის კომიტეტის აქტიური თანამშრომლებით ხორციელდება.
მან საკვირაო სკოლების მხარდაჭერის პროგრამაზე გაამახვილა ყურადღება.

„ამ პროგრამის ფარგლებში ხდება საკვირაო სკოლების იმ საჭიროებით უზრუნველყოფა, რაც აუცილებელია ჩვენი თანამემამულეების, ახალგაზრდების, ბავშვების კიდევ უფრო მეტი მოტივაციისთვის, რათა მათ კარგად ისწავლონ ქართული ენა, კულტურა და ისტორია, შეინარჩუნონ ის იდენტობა, რომელიც ძალიან ძვირფასია ჩვენი თანამემამულეებისთვის საზღვარგარეთ“, - განაცხადა ხათუნა თოთლაძემ.

მომხსენებელმა ისაუბრა პედაგოგების გადამზადების პროგრამასა და კალიგრაფიის კონკურსზე, ასევე უცხოეთში მოქმედი ქართული ცეკვისა და სიმღერის ანსამბლების მხარდაჭერის და ახალგაზრდული ღონისძიებების ხელშეწყობის პროგრამებზე.

„საგარეო საქმეთა სამინისტრო იყენებს ყველა პლატფორმას იმისთვის, რომ დიასპორა იყოს ჩართული იმ პოლიტიკაში, რომელსაც სახელმწიფო ახორციელებს, რადგან ძირითად სლოგანს „ძლიერი დიასპორა - ძლიერი სახელმწიფო“, სამინისტროს მიერ დაგეგმილი აქტივობები მაქსიმალურად შეესაბამებოდეს“, - განაცხადა ხათუნა თოთლაძემ.

მომხსენებლის ინფორმაციით, 2025 წელს, სამინისტროში განხორციელებულ სტრუქტურული ხასიათის რეფორმასთან ერთად, მოხდა დიასპორული პოლიტიკის კონცეფციისა და სტრატეგიის ახლებურად გააზრება, შემუშავდა დიასპორული პოლიტიკის რეფორმა, რომლის პრეზენტაციაც 2026 წლის 27 მაისს გაიმართება.

როგორც დიასპორის კომიტეტის თავმჯდომარემ ირაკლი ზარქუამ განაცხადა, დიასპორული მიმართულებით მნიშვნელოვანი წარმატებები გვაქვს, თუმცა ჯერ კიდევ არსებობს გამოწვევები, რომელიც ახალი ხედვებით და მიდგომებით აუცილებლად იქნება დაძლეული.