საარჩევნო ბლოკი: „გიორგი ვაშაძე-სტრატეგია აღმაშენებელი“ საქართველოს პარლამენტში კანონპროექტს აინიცირებს, რომელიც „სახელმწიფო პენსიის შესახებ“ საქართველოს კანონის მე-15 მუხლში ცვლილებების შეტანას გულისხმობს.

კანონპროექტში ცვლილების შეტანის შედეგად, პენსიონერს ექნება უფლება პენსიის გამცემი საბანკო დაწესებულება თავად შეარჩიოს.

„კანონში უნდა გაჩნდეს ჩანაწერი, რომელიც ამბობს, რომ პენსიონერს ექნება საბანკო მომსახურების თავისუფალი არჩევის უფლება. ამაზე წინასაარჩევნოდ 50 ათასი ხელმოწერა შევაგროვეთ და დღეს ვახდენთ ჩვენი დაპირების რეალიზებას“, - განაცხადა გიორგი ვაშაძემ.

მისივე თქმით, დღეს საქართველოში პენსიის გაცემის ექსკლუზიურ უფლებას „ლიბერთი ბანკი“ ფლობს, მას არ ჰყავს კონკურენტი და შესაბამისად ბაზარზე პირობებს სწორედ აღნიშნული ბანკი ადგენს. საპენსიო მომსახურებაზე თავისუფალი კონკურენციის პირობებში, როდესაც ერთ ბანკს აღარ ექნება საპენსიო მომსახურების ექსკლუზიური უფლება, ავტომატურად დაიწევს საპენსიო სესხის საპროცენტო განაკვეთიც.

„მადლობა მინდა ვუთხრა ჩვენს მხარდამჭერებს რომ ამის ინიცირების უფლება მოგვეცა პარლამენტში. ამით ვიწყებთ საკანონმდებლო განხილვას“, - აღნიშნა გიორგი ვაშაძემ.

აღნიშნულ საკანონმდებლო ინიციატივას ხათუნა სამნიძე და ტარიელ ნაკაიძეც შეუერთდნენ.

„ამ კანონპროექტით ჩვენ სივრცეს ვაძლევთ პენსიონერებს, შეზღუდული შესაძლებლობების მქონე პირებს, სოციალურად დაუცველ ადამიანებს, რომ თვითონ აირჩიონ სად დაერიცხოთ პენსია“, - განაცხადა ხათუნა სამნიძემ.