„ოლიგარქიული მმართველობის წინააღმდეგ შემოთავაზებული ჩვენი პროექტი არის პრინციპულად განსხვავებული და უნიკალური იმ თვალსაზრისით, რომ კანონპროექტი ითვალისწინებს ქართულ კონტექსტს ოლიგარქიული მმართველობის პრობლემებთან დაკავშირებით, შეიცავს ოლიგარქიული მმართველობის ნიშნებს და კრიტერიუმებს, განსხვავებული და ბევრად უფრო მოცულობითია ოლიგარქის სტატუსის მინიჭებასთან დაკავშირებული კრიტერიუმები“, - განაცხადა ფრაქციის „ერთიანი ნაციონალური მოძრაობა“ - გაერთიანებული ოპოზიცია „ძალა ერთობაშია“ თავმჯდომარის პირველმა მოადგილემ ლევან ბეჟაშვილმა შეხვედრაზე, სადაც ჟურნალისტებს საარჩევნო ბლოკის „ერთიანი ნაციონალური მოძრაობა - ძალა ერთობაშია“ კანონპროექტი „ოლიგარქიული მმართველობის წინააღმდეგ“ გააცნო.

ლევან ბეჟაშვილის განმარტებით, შემოთავაზებული საკანონმდებლო ინიციატივა პრობლემისადმი სისტემურ მიდგომას ითვალისწინებს, მისი მთავარი მიზანია ფაქტობრივი და სამართლებრივი პირობების აღმოფხვრა, ასევე პრევენციის მექანიზმების შექმნა იმისათვის, რათა ოლიგარქიული მმართველობის ჩამოყალიბება სამართლებრივად შეუძლებელი გახდეს.

„ეს კანონპროექტი არ არის მიმართული რომელიმე ერთი კონკრეტული სახელის და გვარის მიმართ, იგი ითვალისწინებს იმ ფაქტს, რომ ქვეყანაში მომავალში არ მოხდეს ოლიგარქიული მმართველობის შემოღება. ჩვენი პროექტი განსხვავებული იმითაა, რომ აქ სახელები და გვარები არ უნდა იკითხებოდეს, არამედ ეს კანონი უნდა იყოს პრევენცია იმისა, რომ მომავალში ქვეყანაში ოლიგარქიული მმართველობა აღარ ჩამოყალიბდეს. ასევე განსხვავებული მახასიათებელი ამ პროექტის არის ის, რომ ოლიგარქიული მმართველობის და ოლიგარქის სტატუსების მინიჭება უკავშირდება არა რომელიმე პოლიტიკურ და სახელისუფლებო ორგანოს, არამედ საკონსტიტუციო სასამართლოს. პროცესი უნდა იყოს თავისუფალი პოლიტიკური შინაარსისგან და ოლიგარქის სტატუსის მინიჭება და ოლიგარქიული მმართველობის ნიშნების დადგენა უნდა იყოს იურიდიული სამართლებრივი სამართალწარმოების საფუძველი“, - განაცხადა ლევან ბეჟაშვილმა.

მისი თქმით, ამ პროექტს სჭირდება საკონსტიტუციო ცვლილებების განხორციელება, ვინაიდან ოლიგარქის სტატუსის მინიჭება უფლებრივ შეზღუდვებთან არის დაკავშირებული და მხოლოდ საკონსტიტუციო სასამართლოს შეუძლია ამ უფლებრივ შეზღუდვებზე შესაბამისი გადაწყვეტილების მიღება. საკონსტიტუციო სასამართლოს მოდელის შემოთავაზება, კანონპროექტის ინიციატორთა აზრით, პროცესს პოლიტიკური შინაარსისგან გაათავისუფლებს.