რიგგარეშე სესიის სხდომაზე საარჩევნო კოდექსში შესატანი ცვლილებების თაობაზე კანონპროექტის განხილვა თანმდევ კანონპროექტებთან ერთად დასრულდა.

საკანონმდებლო პაკეტი, რომელიც საარჩევნო რეფორმას ეხება „ქართული ოცნების“ მიერ აღებული ვალდებულებაა, გარდა ამისა, „ქართულ ოცნებასთან“ ერთად პარტია „მოქალაქეებთან“ გაფორმებული მემორანდუმის და შარლ მიშელის მიერ შემუშავებული დოკუმენტის ნაწილია.

საარჩევნო რეფორმის შედეგად, იზრდება პროპორციული წილი ადგილობრივი თვითმმართველობის არჩევნებზე, მაჟორიტარული არჩევნებისთვის კი 40%-იანი ბარიერი წესდება.

ცვლილებები კანონში წარმოდგენილია საარჩევნო სისტემის, საარჩევნო ადმინისტრაციის, წინასაარჩევნო კამპანიის, არჩევნების პროცესის, მისი შეჯამების და საარჩევნო დავების მიმართულებით.

კანონპროექტი ითვალისწინებს ცესკოს წევრთა რაოდენობის, შემადგენლობის და მათი არჩევის წესის, პარტიების მიერ ცესკოს წევრების დანიშვნისა და მათთვის უფლებამოსილების შეწყვეტის წესის ცვლილებას.

პროექტი ითვალისწინებს ცესკოს თავმჯდომარის არჩევის ახალ წესს.

პროექტის მესამე მოსმენით მიღებამდე, პლენარულ სხდომაზე დამატებითი განხილვისათვის გადადებულ საკითხებზე იმსჯელეს და მხარი ორ დანართს დაუჭირეს. ერთი დანართით რეგულირდება თვითმმართველი თემებისა და თვითმმართველი ქალაქების (გარდა თბილისისა) საკრებულოს მაჟორიტარული და პროპორციული საარჩევნო სისტემებით არჩეული შემადგენლობები, ხოლო მეორე დანართით - საკრებულოს არჩევნებისთვის თვითმმართველ თემებში (გარდა თემების ადმინისტრაციული ცენტრებისა) ადგილობრივი მაჟორიტარული საარჩევნო ოლქების სახელწოდებები და საზღვრები.

„დღეს დასრულდა 8- თვიანი სამუშაო პროცესი. ეს პროცესი დაიწყო ჯერ კიდევ მაშინ, როდესაც შედგა მოლაპარაკებების პირველი რაუნდები არჩევნების შემდეგ. პროცესი გაგრძელდა როდესაც ვმუშაობდით შარლ მიშელის დოკუმენტზე და მე მინდა განსაკუთრებული მადლობა გადავუხადო 2 ადამიანს უმრავლესობიდან და ოპოზიციიდან. ამ დოკუმენტის მომზადებისთვის, შალვა პაპუაშვილს და ლევან იოსელიანს. რომლებმაც ძალიან აკადემიური მიდგომით უზრუნველყვეს ამ ძალიან დახვეწილი დოკუმენტის მომზადება, რომელიც უზრუნველყოფს ფუნდამენტურ პროგრესს საარჩევნო გარემოს ცვლილების თვალსაზრისით. კანონით გათვალისწინებულია უამრავი ფუნდამენტური ცვლილება და კანონი უზრუნველყოფს, რომ ფუნდამენტურად შეიცვლება საარჩევნო გარემო ჩვენს ქვეყანაში. ყველა პარტია მხარს უჭერს ამ დოკუმენტს და ვინც პასუხისმგებლობით ეკიდება მიშელის დოკუმენტს ეკუთვნის მადლობა და აქვე, სამწუხაროდ გვიწევს აღნიშვნა, რომ ვინც მხარს არ უჭერს ამ კანონს, ის პირდაპირ ეწინააღმდეგება მიშელის დოკუმენტს“, - განაცხადა ირაკლი კობახიძემ რიგგარეშე სესიის, პლენარულ სხდომაზე “საარჩევნო კოდექსში“ ცვლილებების პროექტის განხილვის დასრულების შემდეგ.

პარლამენტმა საარჩევნო კოდექსში შესატან ცვლილებებს მესამე, საბოლოო მოსმენით, 86 ხმით 3-ის წინააღმდეგ მხარი დაუჭირა.

საპარლამენტო ოპოზიციიდან ფრაქციებმა „ერთიანი ნაციონალური მოძრაობა" - გაერთიანებული ოპოზიცია „ძალა ერთობაშია“ და „ლელო" - პარტნიორობა საქართველოსთვის“ საარჩევნო ცვლილებებს მხარი არ დაუჭირეს.