დიასპორისა და კავკასიის საკითხთა კომიტეტის თავმჯდომარის, ბექა ოდიშარიას ორგანიზებით, პარლამენტში უცხოეთში მოღვაწე წარმატებული დიასპორელები დააჯილდოეს.

 

წარმატებულ დიასპორელებს სიტყვით მიმართა საქართველოს პარლამენტის თავმჯდომარე შალვა პაპუაშვილმა.

 

„უკვე დრო არის, რომ ჩვენ დიასპორას შევხედოთ როგორც წარმატებულ ქართველებს, რომლებიც საქართველოსთან კონტაქტს ინარჩუნებენ და ქვეყანას აძლიერებენ“, - განაცხადა პარლამენტის თავმჯდომარემ.

 

შალვა პაპუაშვილმა ყურადღება გაამახვილა უცხოეთში ქართული ეკლესიის როლზე.

 

„ეკლესია არის ის ადგილი, სადაც ქართველებს შესაძლებლობა აქვთ ერთმანეთი იპოვონ და გვერდში დაუდგნენ. ეკლესიასთან არსებულ საკვირაო სკოლებს დიდი როლი აქვთ. მნიშვნელოვანია, რომ სამშობლოსთან კავშირი, მათ შორის ენობრივი, კულტურული და სულიერი შენარჩუნებული იყოს“, - განაცხადა შალვა პაპუაშვილმა.

 

ღონისძიების მონაწილეებს სიტყვით მიმართა დიასპორისა და კავკასიის საკითხთა კომიტეტის თავმჯდომარე ბექა ოდიშარიამ.

 

მისი თქმით, მნიშვნელოვანია უცხოეთში მცხოვრები თანამემამულეების ღვაწლის დაფასება და ქართული დიასპორის გაძლიერება ეკონომიკურ, პოლიტიკურ თუ საზოგადოებრივ საქმიანობაში ჩართულობით.

 

„ჩვენ ვემზადებით გაფართოებული ფორუმისათვის, სადაც არა მხოლოდ დაჯილდოება იქნება, არამედ გვინდა შემოგთავაზოთ ბიზნეს პროექტები. იმ შესაძლებლობების შესახებ, რომელიც ჩვენს ხელისუფლებას აქვს შემუშავებული, პირადად წარმოგიდგენენ უმაღლესი თანამდებობის პირები, პრემიერ-მინისტრი, პარლამენტის თავმჯდომარე, მინისტრები. ეს იქნება ძალიან სასარგებლო ღონისძიება და ეს უნდა იყოს თქვენი აქტიური ჩართულობის დასაწყისი“, - განაცხადა ბექა ოდიშარიამ.

 

მოწვეულ სტუმრებს სიტყვით მიმართა საგარეო საქმეთა მინისტრის მოადგილე ვლადიმერ კონსტანტინიდიმ და ქართულ დიასპორასთან ურთიერთობაში სამინისტროს როლზე ისაუბრა.

 

ბექა ოდიშარიამ და პარლამენტის წევრებმა წარმატებულ დიასპორელებს, რომლებიც აქტიურად საქმიანობენ ამერიკის შეერთებულ შტატებსა და ევროპის სხვადასხვა ქვეყანაში, მადლობის სიგელები გადასცეს.

 

ღონისძიებას ესწრებოდნენ პარლამენტის წევრები, ჩრდილოეთ ამერიკის ეპისკოპოსი, მეუფე საბა და ქართული დიასპორის წარმომადგენლები.

 

წარმატებული ემიგრანტების დაჯილდოების დასკვნითი ღონისძიება 14 სექტემბერს რუსთაველის ეროვნულ თეატრში გაიმართება.

 

დაჯილდოების ცერემონია პარლამენტის, დიასპორისა და კავკასიის საკითხთა კომიტეტის და ნიუ-იორკის ქართული დიასპორის სახლის ხელმძღვანელის, ინა ასანიძის ორგანიზებით და საგარეო საქმეთა სამინისტროს, დარგობრივი უწყებების მონაწილეობით ტრადიციულად, ყოველწლიურად იმართება.