საგარეო ურთიერთობათა კომიტეტის სხდომაზე საქართველოში უნგრეთის საგანგებო და სრულუფლებიან ელჩს, ანა მარია შიკოს მოუსმინეს.

„ანა მარია შიკო ოთხი წლის განმავლობაში, დაუღალავად შრომობს იმისთვის, რომ ქართულ-უნგრული ურთიერთობები განვითარდეს და ახალ ეტაპზე ავიდეს. მისი ელჩობის პერიოდში უპრეცედენტო სიმაღლეებზე ავიდა ორ ქვეყანას შორის ურთიერთობები. ანა მარია შიკო არის ერთ-ერთი ყველაზე უფრო წარმატებული ელჩი საქართველოში, რადგან სწორედ მისი საქართველოში ელჩობის პერიოდში განხორციელდა არაერთი ვიზიტი უმაღლეს სახელმწიფოებრივ დონეზე. უნგრეთთან ჩვენ გავაფორმეთ სტრატეგიული თანამშრომლობა. ასევე, ჩატარდა სამთავრობო სახელმწიფოთაშორისი კომისიების სხდომები და აღარაფერს ვამბობ იმ მხარდაჭერაზე, რომელსაც ჩვენ უნგრეთის მხრიდან ვიღებდით მთელი ამ წლების განმავლობაში“, - განაცხადა საგარეო ურთიერთობათა კომიტეტის თავმჯდომარემ ნიკოლოზ სამხარაძემ.

„ერთი კვირაში დავტოვებ უნგრეთის ელჩის თანამდებობას ამ მშვენიერ ქვეყანაში, მაგრამ დავბრუნდები როგორც საქართველოს დიდი მეგობარი“, - განაცხადა დიპლომატმა.

სხდომაზე ელჩის გამოსვლა საქართველო-უნგრეთის ორმხრივ ურთიერთობებზე და უნგრეთის საგარეო პოლიტიკაზე საუბარს დაეთმო.

მისი ინფორმაციით, 2022 წელს ხელი მოეწერა პირველ სტრატეგიულ პარტნიორობას და ამ დროიდან მოყოლებული სულ უფრო მეტად ძლიერდებოდა ორ ქვეყანას შორის ურთიერთობები.

„სამინისტროების დონეზე გვქონდა ორმხრივი შეხვედრები. საქართველოში პირველად ჩავატარეთ სამთავრობოთაშორისო სამიტი, სამინისტროებთან ხელი მოვაწერეთ ურთიერთგაგების 11 მემორანდუმს, მუშაობა დავიწყეთ სხვადასხვა პროექტებზე და მივიღეთ გადაწყვეტილება, რომ ერთად ვიმუშავებდით ეკონომიკის განვითარების მიმართულებით“, - განაცხადა დიპლომატმა.

მომხსენებელმა ისაუბრა სოფლის მეურნეობის, გარემოს დაცვის, ტურიზმის, კულტურის და სხვა მიმართულებებით თანამშრომლობის გაძლიერებაზე.

„ჩვენ გვინდა, რომ თქვენ იყოთ ჭიშკარი აღმოსავლეთს, დასავლეთს, ჩრდილოეთსა და სამხრეთ შორის და ეს დაკავშირებადობა გამოიყენოთ იმისთვის, რომ იყოთ ნაწილი იმ დერეფნისა, რომელიც დასავლეთისკენ მიდის“, - განაცხადა ელჩმა.

რუსეთ-უკრაინის ომზე საუბრისას ელჩმა აღნიშნა, რომ ერთადერთი გამოსავალი არის მშვიდობა.

„გეთანხმებით იმაში, რომ არანაირ ფასად არ უნდა ჩავერთოთ ამ პროცესის სამხედრო მხარეში. მხარს გიჭერთ თქვენს პოლიტიკაში - შორს იდგეთ კონფლიქტიდან“, - განაცხადა ელჩმა.

მან ისაუბრა უნგრეთის მიერ უკრაინისთვის გაწეულ დახმარებაზეც.

დიპლომატმა, საკუთარი ქვეყნის სახელით, საქართველოს ტერიტორიული მთლიანობისა და სუვერენიტეტის, ასევე, ჩვენი ქვეყნის ევროპული ინტეგრაციისადმი მხარდაჭერა კიდევ ერთხელ გამოხატა.

„ქართველი ხალხის არჩევანი ჩვენი არჩევანიც არის და საქართველოს არჩეული მთავრობის არჩევანს ჩვენი მხარდაჭერა აქვს“, - განაცხადა ანა მარია შიკომ და იმედი გამოთქვა, რომ საქართველოში უნგრეთის მომავალი ელჩი ორ ქვეყანას შორის არსებულ მეგობრობას და პარტნიორობას კიდევ უფრო გაამყარებს.