ქვეყანაში ბოლო პერიოდში განვითარებულ მოვლენებთან, მათ შორის, „პრაიდ კვირეულის“ ფარგლებში შინაგან საქმეთა სამინისტროს მიერ განხორციელებულ ღონისძიებებთან დაკავშირებით, საქართველოს პარლამენტის პლენარულ სხდომაზე საქართველოს შინაგან საქმეთა მინისტრის მოსმენა იყო დაგეგმილი, თუმცა, მოსმენა დღეს აღარ გაიმართება.

პარლამენტის თავმჯდომარის განცხადებით, ოპოზიციის მიზანი დღევანდელი სხდომის ჩატარება და მინისტრისგან კითხვებზე პასუხის მოსმენა არ ყოფილა.

„ფაქტი ერთია - ის, რაც ჩვენ დღეს ვიხილეთ, მიზანმიმართულად იყო დაორგანიზებული, რათა დღეს ეს სხდომა არ შემდგარიყო. ძალიან სამწუხაროა, რადგან შესვენების დროს მე მოვისმინე განცხადებებიც, სადაც პოლიტიკური ჯგუფები პირდაპირ და ღიად აცხადებენ, რომ მათი მიზანი არ იყო დღეს სხდომის ჩატარება იმისთვის, რომ დაესვათ კითხვები და მოესმინათ პასუხები. მათ განახორციელეს პროტესტი, რომლის უფლება ჰქონდათ, თუმცა, სამწუხაროა, რომ როდესაც იყო მოთხოვნა, რომ დავბრუნებულიყავით ჩვეულებრივ რეჟიმში, ეს არ განხორციელდა. პროტესტი ახლაც გრძელდება იმ ადგილიდან, საიდანაც ერთადერთი ვალდებულება არის გაშუქდეს სესიის სხდომა, რაც ნამდვილად არ წარმოადგენს არა მხოლოდ კონსტრუქციულ ფარგლებში იმ კითხვების და პასუხების მოსმენას, რომელიც საზოგადოებას აინტერესებს. უმრავლესობის მხრიდან დაყენებული იქნა საკითხი, რომ ასეთ რეჟიმში განხილვის გაგრძელება ნამდვილად არ ემსახურება იმ მიზანს, რისთვისაც შევიკრიბეთ და დაინიშნა რიგგარეშე სესიის სხდომა, ამიტომ, დღევანდელ სხდომას დახურულად ვაცხადებ“, - ამის შესახებ პარლამენტის თავმჯდომარემ, კახა კუჭავამ რიგგარეშე სესიის პლენარულ სხდომაზე განაცხადა.

სხდომის დახურვამდე პარლამენტის თავმჯდომარემ პოლიტიკურ ჯგუფებს არაერთხელ მოუწოდა კონსტრუქციულ რეჟიმში გამართულიყო ვახტანგ გომელაურის მოსმენა, დაესვათ მისთვის კითხვები და მოესმინათ პასუხები, რის შემდგომ დეპუტატებს პოლიტიკური განცხადებების გაკეთების შესაძლებლობა ექნებოდათ.