გარემოს დაცვისა და ბუნებრივი რესურსების კომიტეტის მიერ 2012-2014 წლებში გაწეული საქმიანობის ანგარიში წარადგინა პრესისა და საზოგადოების წინაშე პარლამენტის წევრმა, ამ კომიტეტის ყოფილმა თავმჯდომარემ გიორგი ცაგარეიშვილმა დღეს გამართულ ბრიფინგზე.

როგორც გიორგი ცაგარეიშვილმა განაცხადა, გარკვეული მიზეზების გამო, წინა მოწვევის პარლამენტში ამ კომიტეტის საქმიანობა ფაქტობრივად პარალიზებული იყო, ამიტომ, შეიძლება ითქვას, რომ  კომიტეტის საქმიანობის აღორძინება 2012 წლის მოწვევის პარლამენტში დაიწყო.

„პირველი, რაც კომიტეტმა განახორციელა, იყო გარემოსა და ბუნებრივი რესურსების სამინისტროსათვის ფუნქციების აღდგენა-დაბრუნებაზე ზრუნვა, რისთვისაც კომიტეტის ძალისხმევით, პარლამენტმა რამდენიმე კვირაში მნიშვნელოვანი საკანონმდებლო პაკეტი მიიღო. სამინისტროს მნიშვნელოვანი უფლებები დაუბრუნდა, რის შემდეგაც სამინისტრომ და კომიტეტმა ერთად განახორციელეს გარკვეული საქმიანობა ბუნების დაცვის მიმართულებით“, - განაცხადა გიორგი ცაგარეიშვილმა.

ამ ორი წლის განმავლობაში კომიტეტმა 159 კანონპროექტი, 2 კონვენცია, რამდენიმე საერთაშორისო შეთანხმება და ხელშეკრულება მოამზადა. მან ყურადღება იმ რამდენიმე კანონპროექტზე და დოკუმენტზეც გაამახვილა, რომელთა მიღებითაც მდგომარეობა გარემოს დაცვის სფეროში მნიშვნელოვნად შეიცვალა უკეთესობისკენ.  ესენია: “ბუნების ძეგლების შექმნისა და მართვის შესახებ“, „ბუნებრივი რესურსებით სარგებლობისთვის მოსაკრებლის შესახებ“, „საქართველოს კანონში ცვლილების შეტანის თაობაზე“, საქართველოს ეროვნული სატყეო კონცეფცია, „ფშავ-ხევსურეთის დაცული ტერიტორიების შექმნისა და მართვის შესახებ“, „ნარჩენების მართვის კოდექსი“ და სხვა. კომიტეტმა ამ ხნის განმავლობაში მრავალ საჯარო სკოლასა და გარემოსდაცვით ორგანიზაციასთან გააფორმა თანამშრომლობის მემორანდუმი. კომიტეტის რამდენიმე გასვლითი სხდომა გაიმართა ტყიბულში, ჭიათურასა და ლაგოდეხში ამ რაიონებში გარემოს დაცვის კუთხით არსებული პრობლემების ადგილებზე გასაცნობად და რეალური გადაწყვეტილებების შესამუშავებლად.

როგორც გიორგი ცაგარეიშვილმა აღნიშნა, ევროკავშირისა და გაეროს განვითარების პროგრამის (UNDP) მხარდაჭერითა და დახმარებით, შეიმუშავეს კომიტეტის სამოქმედო გეგმა მომავალი ორი წლისათვის, რომლის პრეზენტაცია ამ დღეებში იგეგმებოდა.  „ესაა უნიკალური პროექტი კომიტეტის შესაძლებლობების გაძლიერების მიმართულებით. იმედია, მომავალში, ვინც არ უნდა მოვიდეს კომიტეტის სათავეში, არ გადაუხვევს იმ ძირითად გეზს, რაც ჩვენ დავსახეთ კომიტეტის საქმიანობის გასააქტიურებლად“, - განაცხადა გიორგი ცაგარეიშვილმა და იმედი გამოთქვა, რომ კომიტეტის ახალი ხელმძღვანელობა საქმიანობას სწორედ ამ მნიშვნელოვანი ნაშრომის საფუძველზე განახორციელებს.

„შემიძლია ვთქვა, რომ  მეტნაკლებად ვალმოხდილი მივდივარ თანამდებობიდან. „თავისუფალ დემოკრატებს“ 1 ოქტომბრის ღირებულებებისთვის არ გადაგვიხვევია და მომავალშიც ასე გავაგრძელებთ. ყოველი ფეხის ნაბიჯზე გავაკონტროლებთ მთავრობისა და პარლამენტის საქმიანობას“, - განაცხადა გიორგი ცაგარეიშვილმა. დასასრულ, მან კომიტეტის აპარატის წევრებს ნაყოფიერი თანამშრომლობისათვის მადლობა გადაუხადა.