საქართველოს პარლამენტის წევრები ეკა ბესელია და გედევან ფოფხაძე სხვადასხვა უნივერსიტეტის სტუდენტებს შეხვდნენ.

პარლამენტის წევრებმა ახალგაზრდებთან შეხვედრისას აღნიშნეს, რომ საპარლამენტო რესპუბლიკაში პარლამენტს ყველაზე მნიშვნელოვანი როლი და ფუნქცია აქვს.

„პარლამენტი უმაღლესი წარმომადგენლობითი ორგანოა. ხელისუფლების სამ შტოს შორის, რომლებიც ერთმანეთს უნდა აბალანსებდეს, პარლამენტს გადამწყვეტი როლი აქვს იმიტომ, რომ პარლამენტი ქმნის კანონს და თავადვე აკონტროლებს მის მიერ მიღებული კანონის აღსრულებას“, - განაცხადა ეკა ბესელიამ.

კანონმდებელი ახალგაზრდებს ესაუბრა საქართველოს პარლამენტარიზმის 100 წლის ისტორიაზე და საქართველოს პარლამენტის საქმიანობის პრინციპებზე.

ეკა ბესელიამ სტუდენტებს სხვადასხვა მოწვევის პარლამენტებში მისი საქმიანობა გააცნო.

„წინა მოწვევის პარლამენტში, როგორც ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ, დავიწყე საპარლმენტო კონტროლზე მუშაობა და პირველად შევქმენით, საპარლამენტო კონტროლის თვალსაზრისით, სახალხო დამცველის ანგარიშის მოსმენის ახალი სტანდარტი“, - განაცხადა დეპუტატმა

ეკა ბესელიამ და გედევან ფოფხაძემ სტუდენტების შეკითხვებს უპასუხეს, რომლებიც შეეხებოდა: სასამართლო რეფორმას, საარჩევნო სისტემებს, განათლების სფეროში განხორციელებულ რეფორმებს და სხვა საკითხებს.