პარლამენტის წევრმა, გოგა გულორდავამ სტუდენტური პარლამენტის დარგობრივი ეკონომიკისა და ეკონომიკური პოლიტიკის კომიტეტის წევრებთან შეხვედრა გამართა. დეპუტატმა სტუდენტებს პარლამენტის საქმიანობის ძირითადი მიმართულებები, კანონშემოქმედებითი პროცესი და საკომიტეტო მუშაობის პროცედურები გააცნო. მანვე ახალგაზრდებთან კომიტეტში ინიცირებულ კანონპროექტებზე ინფორმაცია მიაწოდა და იმ საკანონმდებლო სიახლეებზე ისაუბრა, რომლებსაც კომიტეტები ამ ეტაპზე განიხილავენ.

შეხვედრაზე პარლამენტის წევრი სტუდენტური პარლამენტის საქმიანობით დაინტერესდა და ახალგაზრდებისგან ის ინიციატივები მოისმინა, რომელთა მიღებასაც სტუდენტები მნიშვნელოვნად მიიჩნევენ. ერთ-ერთ ასეთ საკითხს სასტუმროებისთვის ვარსკვლავების მინიჭების კანონმდებლობის დონეზე დარეგულირება წარმოადგენდა. შეხვედრა ინტერაქტიულ რეჟიმში, კითხვა-პასუხით გაგრძელდა, რომლის დროსაც ახალგაზრდებმა მათთვის საინტერესო თემებზე პარლამენტის წევრის მოსაზრებები მოისმინეს. შეხვედრის დასასრულს გოგა გულორდავამ სტუდენტური პარლამენტის წევრებს წარმატებები უსურვა და მათთან თანამშრომლობის გაგრძელების სურვილი გამოთქვა.