კახაბერ კუჭავა ევროკავშირის ელჩს საქართველოში, იანოშ ჰერმანს შეხვდა
გარემოს დაცვისა და ბუნებრივი რესურსების კომიტეტის თავმჯდომარე, კახაბერ კუჭავა ელჩს საქართველოში, იანოშ ჰერმანს შეხვდა.
გაცნობითი ხასიათის შეხვედრაზე მხარეებმა, ძირითადად, საქართველოში გარემოს დაცვის საკითხებზე და ამ მიმართულებით გადასადგმელ ნაბიჯებზე ისაუბრეს.
შეხვედრაზე ყურადღება საქართველოსთვის გარემოსდაცვითი სტრატეგიის მნიშვნელობაზე გამახვილდა. როგორც აღინიშნა, გასულ წლებში, ამ საკითხს ნაკლები ყურადღება ექცეოდა, თუმცა, ახლა ის ერთერთი პრიორიტეტია და ამ მიმართულებით ევროკავშირი საქართველოსთან თანამშრომლობის გაფართოებას და გააქტიურებას გეგმავს.
„ვისაუბრეთ გარემოს დაცვის საკითხების მნიშვნელობაზე, იმაზე, თუ რამდენად უნდა გააძლიეროს საქართველომ ამ მიმართულებით საქმიანობა. ხაზგასმით აღინიშნა ის ფაქტი, რომ ვალდებულებები ასოცირების ხელშეკრულების კუთხით შესასრულებელია და დაიგეგმა ბევრი საინტერესო მიმართულება, რომელზეც მომავალში ვითანამშრომლებთ“, - განაცხადა შეხვედრის შემდეგ კომიტეტის თავმჯდომარემ.
როგორც კახაბერ კუჭავამ აღნიშნა, გარემოს დაცვის კუთხით მექანიზმების გაძლიერებასა და ამ მიმართულებით მიღებული კანონების აღსრულებაში მოსაყვანად ევროკავშირის მხარდაჭერა განსაკუთრებით მნიშვნელოვანია.
